गव्हाच्या चीकाच्या वड्या

🌺बॉम्बे हलवा/माहीम हलवा , चीकाच्या वड्या🌺

आज संकष्टीनिमित्त गणपतीला नैवेद्यासाठी माहीम हलवा बनवला. 

असं वाटलं बाप्पा ही नुसते मोदक खाऊन कंटाळत असेल नै, 😄 म्हणून जरा व्हरायटी नैवेद्यात. 

गव्हाचा चीक खायची इच्छा झाली होती म्हणून गहू घातले होते भीजत तीन दिवसांपासून. आज त्याचा चीक काढला. थोडा तसाच कुरडयांसाठी उकडतो तसा उकडून मस्त तूप तिखट घालून खाल्ला एकदम वाटी चाटून पुसून. पण मुलाला काही फारशी अशी चव आवडत नाही. खा ,खा, म्हणून मागे लागून आणि पौष्टिकपणाचे गोडवे गाऊन, बरंच समजावून झालं पण काही उपयोग होईना. त्याच्या पोटात हा पौष्टिक पदार्थ कसा जाईल अशा विचारात होते ," खीर करावी का? की त्याला साखर घालून देऊ? " तेवढ्यात आईचा फोन आला नातवाला परीक्षेसाठी बेस्ट लक द्यायला. नेहमीप्रमाणेच लगेच मी तिला माझी काळजी बोलून दाखवली . तिच्याकडे एकवीस अपेक्षित गाईड सारखी असतातच उत्तरं तयार माझ्या कुठल्याही प्रश्नांना.

आईने सांगितले ह्याचा माहीम हलवा /बॉम्बे हलवा कर चितळेंच्यात मिळतो तसा मग बघ कसा चट्टामट्टा करून संपवेल ते. 😊

माझी तर एकदम ट्यूब च पेटली. 😇 म्हंटलं हे नक्की खाणारच तो. 

लागले तयारीला...

आईने सांगितल्या प्रमाणे एक वाटी साखरेचा साधारण एकतारीच्या अलीकडचा पाक केला त्यात गव्हाचा अर्धी वाटी चीक,आणि चमचाभर  तूप घालून गॅस मंद ठेवून एकसारखं मिश्रण हलवत राहिले. चीक घट्ट होत आल्यावर त्यात केशरी रंग,  रोझ इसेन्स, सुक्यामेव्याचे काप घातले . चांगलं एकजीव होऊन काढाईपसून सुटून येईपर्यंत चीक चमच्याने हलवत राहिले. छान गोळा झाल्यावर तूप लावलेल्या ताटात तो गोळा ओतून एकसारखा थापून गार झाल्यावर वड्या पाडल्या. 

आता दुसऱ्या पद्धतीचा...

दीड वाटी दूध, एक वाटी चीक, अर्धी वाटी तूप, अर्धी वाटी साखर सगळं छान एकजीव करून कढई मंद गॅस वर ठेवून हे मिश्रण एकसारखं चमच्याने ढवळत राहिले. वरीलप्रमाणेच छान गोळा तयार होत आल्यावर त्यात वेलदोडापूड, सुक्यामेव्याचे काप घालून तो गोळा छान एकजीव होईपर्यंत चमच्याने हलवत राहिले. त्यात गाठी होता कामा नये असं एकजीव व्हायला हवं. तो गोळा अल्युमिनियम फॉईल वर घालून त्यावर केशराच्या काड्या घालून वरून परत दुसरी फॉईल त्यावर घालून लाटण्याने मिश्रण गरम असतानाचअगदी पातळ होईल असे लाटून घेतले . व्यवस्थित गार झाल्यावर आयताकृती काप केले . 

तयार माहीम हलवा, बॉम्बे हलवा. 

असा कलरफुल हलवा पाहून मुलानेच बाप्पाला पटकन नैवेद्य दाखवला आणि काहीही आढेवेढे न घेता मस्तपैकी गट्टम पण केला . 

माझ्या एकवीस अपेक्षितच्या गाईडच्या उत्तराचे शंभर पैकी शंभर गुण ही मिळाले. परत एकदा मी मनोमन सरस्वती,अन्नपूर्णा रुपी माझ्या आईला नमस्कार केला. आणि देव्हाऱ्याजवळ जाऊन नमस्कार करायला वाकले, समईच्या उजेडात पाहते तर बाप्पाही माझ्याकडे पाहून गालातल्या गालात स्मित करत होता.😊

गणपती बाप्पा मोरया!🌺

© सौ. श्वेता अनुप साठये

२२/२/२०१९